ខេត្តតាកែវ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងប្រាប់បណ្ដាលអង្គទូតនានាប្រចាំកម្ពុជាថា កម្ពុជាមិនដែលនិយាយអំពីការវាយលុកដល់ទីក្រុង ឬប្រមាថអ្នកណានោះទេ មិនដូចក្រុមជ្រុលនិយមរបស់ថៃ បានប្រកាសចង់វាយយករាជធានីភ្នំពេញ។
ការលើកឡើងរបស់ នាយករដ្ឋមន្ត្រី នៃកម្ពុជា បន្ទាប់ពី អ្នកនយោបាយជ្រុលនិយមថៃ ស៊ិនធិ លឹមថងគុល បាននិយាយយ៉ាងច្បាស់ៗថា «ប្រសិនបើឈ្នះឆ្នោតដឹកនាំប្រទេសមានអំណាចពេញដៃ នឹងលើកកងទ័ពវាយប្រហារចូលទឹកដីកម្ពុជា យកខេត្តមួយចំនួនរបស់កម្ពុជា ដូចជា បាត់ដំបង សៀមរាប បន្ទាយមានជ័យ ព្រះវិហារ និងកោះគុជ ហើយអាចរហូតដល់រាជធានីភ្នំពេញទៀតផង»។
នាឱកាសអញ្ជើញជាអធិបតីប្រារព្ធទិវាមច្ឆជាតិ និងលែងកូនត្រីប្រមាណ ១.៥លានក្បាល ចូលបឹងទន្លេបាទី ស្ថិតក្នុងភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ នាព្រឹកថ្ងៃទី០១ ខែកក្កដា ឆ្នាំ២០២៥នេះ សម្តេចធិបតី ហ៊ុន ម៉ាណែត បានថ្លែងថា កម្ពុជាជ្រើសយកសន្ដិភាព និងច្បាប់អន្ដរជាតិ ដើម្បីដោះស្រាយបញ្ហាព្រំដែន កម្ពុជា-ថៃ ហើយកម្ពុជា ក៏មិនប្រើកម្លាំងបាយ ប៉ុន្ដែភាគីម្ខាងទៀតកុំគិតថា «កម្ពុជា ខ្លាចឱ្យសោះ» កងទ័ពកម្ពុជា បានត្រៀមលក្ខណៈគ្រប់បែបយ៉ាង រួចជាសម្រេច ដើម្បីការពារទឹកដីរបស់កម្ពុជា។
សម្តេចធិបតី បន្ដថា កម្ពុជាមិនចាំបាច់អួតដូចគេឡើយ គេថា បន្តិចចង់វាយយកខេត្តនេះ ខេត្តនោះ របស់កម្ពុជា ប៉ុន្ដែកម្ពុជាបញ្ជាក់ហើយថា តែកុំចូលមកកម្ពុជា, កម្ពុជាសូមតែរក្សាសិទ្ធិការពារខ្លួនតែប៉ុណ្ណោះ។
សម្ដេចធិបតីនាយករដ្ឋមន្ដ្រី មានប្រសាសន៍ថា «តិចៗ វ៉ៃមកភ្នំពេញ តិចៗវ៉ៃអានេះ។ យើងមិនចាំបាច់មាត់ទេ អាហ្នឹងយុទ្ធសាស្ដ្រសង្គ្រាមរបស់ចិន។ យើងមិនអួតរឿងអាវុធ យើងមិនអួតរឿងធ្វើផែនការវ៉ៃយក ខេត្តណា ក្រុងណានោះទេ យើងមិនដែលនិយាយរឿងហ្នឹង។ យើងនិយាយតែពីកុំចូលមក ទឹកដីយើង ហើយយើងការពារតែប៉ុណ្ណឹងទេ។ ឯកឧត្តម ឯកអគ្គរាជទូត រដ្ឋទូត នៅទីនេះ កម្ពុជា មិនដែរនិយាយអំពីការវ៉ៃលុក ដល់ ទីក្រុងអ្នកណា ប្រមាថអ្នកណា គេទេ សូមតែការពារទឹកដីរបស់យើង»។
ជាមួយគ្នានេះ សម្ដេចធិបតី នាយករដ្ឋមន្រ្ដីបញ្ជាក់ជាថ្មីថា នៅតំបន់ប្រាសាទតាមាន់ធំ តាមាន់តូច តាក្របី និងតំបន់មុំបី ជាតំបន់ដែលមិនទាន់ចរចាដាច់ស្រេច មិនអាចឱ្យនរណាអាចកំណត់ជារបស់ខ្លួនជាឯកតោភាគីបានឡើយ៕ប្រភពអាកាប៉េ
