ខេត្តស្រះកែវ -ថៃ ៖ ថ្នាក់ដឹកនាំនិងអ្នកសារព័ត៌មានមកពីប្រទេសកម្ពុជា ថៃ ព្រមទាំងតំណាងអ្នកព័ត៌មានឡាវ វៀតណាមនៃសហព័ន្ធប្រព័ន្ធផ្សព្វផ្សាយអាស៊ាន(UMA) បានជួបប្រជុំប្រចាំឆមាសដើម្បីពិនិត្យការបណ្តុះបណ្តាលស្តីពីបច្ចុប្បន្នភាពវិជ្ជាជីវ:និងវឌ្ឍនភាពការងារផ្នែកព័ត៌មាន រួមទាំងការអភិវឌ្ឍន៍បច្ចេកវិទ្យាបញ្ឮាសិប្បនិមិត្ត(AI) ដែលបានឈានចូលវិស័យនេះ និងត្រៀមរៀបចំសន្និបាតប្រចាំឆ្នាំផងដែរ ។
ថ្ងៃទី២៣ ខែសីហា ឆ្នាំ២០២៤ អង្គប្រជុំដែលដឹកនាំដោយបណ្ឌិត ប្រាស៉ើដ្ឋ សែនរុងរឿង អគ្គលេខាធិការ លោកបណ្ឌិត ប្រូយ សម្បត្តិ អគ្គលេខាធិការរងប្រចាំប្រទេសថៃ លោកបណ្ឌិត សុខ សុវណ្ណ អគ្គលេខាធិការរងប្រចាំប្រទេសកម្ពុជា នៅទីស្នាក់ការសហព័ន្ធប្រព័ន្ធផ្សព្វផ្សាយអាស៊ាន(UMA) នាស្រុកអារញ្ញប្រថេត ខេត្តស្រះកែវ ប្រទេសថៃ ។
ប្រតិភូអ្នកសារព័ត៌មានកម្ពុជាដឹកនាំដោយលោក សុខ សុវណ្ណ អគ្គលេខាធិការរងយ៉ូម៉ាមានចំនួន 50 រូប ដែលបានទៅចូលរួមក្នុងអង្គប្រជុំនោះ រួមមានគណៈកម្មការនាយក ទីប្រឹក្សា និងអ្នកសារព័ត៌មានមួយចំនួន ក្នុងនោះមានព្រះសង្ឃពីរអង្គដែលមានតួនាទីជាទីប្រឹក្សាជាន់ខ្ពស់យូម៉ាបាននិមន្តចូលរួមប្រជុំផងដែរ។
អគ្គលេខាធិការរង គណៈ:កម្មាធិការនាយក ទីប្រឹក្សា អ្នកជំនាញការ និងអ្នកសារព័ត័មាន និងតំណាងអ្នកព័ត៌មានមកពីប្រទេសខាងលើបានលើកឡើងពីស្ថានភាព សភាពការណ៍និងដំណើរការការងារលើវិស័យព័ត៌មាន ច្បាប់ ក្រមសីលធម័វិជ្ជាជីវ: លទ្ធផលការងារនិងបញ្ហាប្រឈមរបស់ខ្លួន។
បន្តពីនោះ វាគ្មិនបានលើកឡើងពីការធ្វើបច្ចុប្បន្នភាពចំណេះជំនាញ វិជ្ជាជីវ: បច្ចេកទេសលើការថតរូប ការសរសេរព័ត៌មានទាន់ហេតុការណ៍ ព័ត៌មានលើវិស័យនានា ព័ត៌មានស៊ើបអង្កេត បច្ចេកវិទ្យាឌីជីថលនិងបញ្ញាសិប្បនិមិ្មត និងការខិតខំបំពេញការងារប្រកបដោយក្រមសីលធម័ គោរពច្បាប់និងប្រកបដោយការទទួលខុសត្រូវ ។
ចំពោះចំណេះជំនាញថ្មីគឺបញ្ញាសិប្បនិម្មិត (artificial intelligence) ឬហៅថា AI វាគ្មិនភាគីថៃអះអាងថា ៖ ភាគីខ្លួនបាននឹងកំពុងសហប្រតិបត្តិការនិងចុះអនុស្សារណ:យោគយល់គ្នា(MoU) ជាមួយដៃគូររួមមានសាកលវិទ្យាល័យ និងម្ចាស់ជំនួយនានាដើម្បីបង្កើតវគ្គបណ្តុះបណ្តាលរយ:ពេលខ្លីនិងមធ្យមដល់អ្នកសារព័ត៌មាននៃសហព័ន្ធប្រព័ន្ធផ្សព្វផ្សាយអាស៊ាន(UMA) ហើយចេញវិញ្ជាបនប័ត្រនិងសញ្ញាប័ត្រដែលត្រូវបានទទួលស្គាល់ជាអន្តរជាតិ។
លោកបណ្ឌិត ប្រាស៊ើដ្ឋ សែនរុងរឿង អគ្គលេខាធិការសហព័ន្ធប្រព័ន្ធផ្សព្វផ្សាយអាស៊ាន(UMA) បានថ្លែងថា៖ អ្នកសារព័ត័មានគម្បីស្គាល់តួនាទី ភារកិច្ចរបស់ខ្លួន ហើយមានទស្សនវិស័យ(Vision)និងបេសកកម្ម(Mission) ច្បាស់លាស់ក្នុងការបំពេញការងារដើម្បីបម្រើសារធារណ:ជនដែលជាអ្នកអាន អ្នកស្តាប់ អ្នកទស្សនារបស់ខ្លួន។ ក្នុងនោះ ប្រជាជាតិអាស៊ីភាគអគ្នេយ៍ឬអាស៊ាន ទាំងផ្នែករដ្ឋាភិបាល ផ្នែកសង្គមស៊ីវិលនិងផ្នែកឯកជន អ្នកសារព័ត៌មានត្រូវតែបន្តបំពេញតួនាទីផ្តល់ព័ត៌មានពិត មិនលំអៀង មិនរើសអើង មិនបង្កផលប៉ះពាល់ ប្រៀបបាននឹងស្ពានមិត្តភាព សាមគ្គីភាព សន្តិភាពរវាងរវាងប្រជាជាតិនានាក្នុងអាស៊ាន និងលើសកលលោក ពោលគឺត្រូវនាំមកនូវព័ត៌មានពិតក្នុងន័យស្ថាបនា និងផ្តល់តម្លៃដល់គ្រប់ភាគី គ្រប់និន្នាការនិងប្រជាជាតិនានាអោយអាចទទួលយកបាន ។
សូមបញ្ជាក់ថានាឱកាសនោះ ក៏មានប្រកាសទទួលស្គាល់នូវសមាជិកគណ:កម្មាធិការនាយក និងទីប្រឹក្សាថ្មីមួយចំនួនរបស់សហព័ន្ធផងដែរ ៕
