ខេត្តបន្ទាយមានជ័យ មន្ត្រីពេទ្យសត្វនៃមន្ទីរកសិកម្មនិងរុក្ខាប្រម៉ាញ់ខេត្តបន្ទាយមានជ័យ បានចុះបង្ក្រាបទីតាំងស្តុក រក្សាទុកសត្វជ្រូករស់និងក្លាសេមួយកន្លែងស្ថិតនៅក្បែរអូរព្រំដែនកម្ពុជា-ថៃ ចំណុចភូមិបន្ទាយថ្មី ឃុំអូរបីជាន់ ស្រុកអូរជ្រៅដែលសង្ស័យថាមានការនាំចូលពីប្រទេសថៃដោយខុសច្បាប់។ ក្រោមកិច្ចសហការជាមួយមន្ត្រីមូលដ្ឋាន សម្របសម្រួលដោយលោក លឹម ប៊ុនសុភ័ក្ត្រ ព្រះរាជអាជ្ញារងអមអយ្យការសាលាដំបូងខេត្ដបន្ទាយមានជ័យ នៅថ្ងៃទី១៧ ខែមករា ឆ្នាំ២០២២។
លោក ហ៊ុយ ទូច ប្រធានការិយាល័យផលិតកម្មនិងបសុព្យាបាលនៃមន្ទីរកសិកម្មនិងរុក្ខាប្រម៉ាញ់ខេត្តបន្ទាយមានជ័យ បានឱ្យដឹងថា ដោយសង្ស័យពីករណីនាំចូលជ្រូកកណ្តុរពីប្រទេសថៃដោយខុសច្បាប់ យកមករក្សាទុកក្នុងរូបភាពកសិដ្ឋានចិញ្ចឹម កម្លាំងជំនាញសហការជាមួយមន្ត្រីមូលដ្ឋានបានចុះឆែកឆេរនិងសួរនាំរកឯកសារពាក់ពន្ធ័។ ក្រោយសមត្ថកិច្ចនិងកម្លាំងជំនាញចុះដល់ទីតាំង ម្ចាស់បានធ្វើវាយកំទេចទ្រុងដើម្បីឱ្យជ្រូករត់ចេញពីទ្រុងរត់ចូលព្រៃអស់ ហើយម្ចាស់គេចខ្លួនបាត់។
លោក ហ៊ុយ ទូច បានបញ្ជាក់ឱ្យដឹងថា ម្ចាស់ទីតាំងមានឈ្មោះ តាំ ជ័យ ភេទប្រុស អាយុ៤០ឆ្នាំ ស្នាក់នៅទីតាំងខាងលើ មានមុខរបរជាអ្នកនាំចូលជ្រូកកណ្តុរពីប្រទេសថៃដោយខុសច្បាប់។ ក្រោយសមត្ថកិច្ចចុះដល់ ម្ចាស់ទីតាំងរូបនេះបានធ្វើការវាយកំទេចទ្រុងឱ្យជ្រូកកណ្តុររស់ប្រមាណជា៧០ក្បាលបានរត់ចូលព្រៃ និងនៅសេសសល់ជ្រូករស់២ក្បាលត្រូវបានដកហូត។
សូមបញ្ជាក់ផងដែរថានៅក្នុងកិច្ចសហប្រតិបត្តិការនោះដែរ សមត្ថកិច្ចជំនាញបានដកហូតសត្វជ្រូកធ្វើរួចចំនួន៩ក្បាល បន្ថែមដែលជនសង្ស័យក្លាសេទុកក្នុងធុងទឹកកក។ហើយនេះជារូបភាពថ្មីមួយទៀតដែលអ្នករកស៊ីនៅតាមបន្ទាត់ព្រំដែនកម្ពុជា-ថៃ ធ្វើដើម្បីបន្លំភ្នែកសមត្ថកិច្ចជំនាញ ដោយដឹកជ្រូករស់មកដាក់ក្នុងទ្រុងកសិដ្ឋានជាលក្ខណៈចិញ្ចឹម ហើយលក់ចេញទៅទីផ្សារ ខណៈជ្រូកកណ្តុរកំពុងមានហាងឆេងល្អ និងពិបាកក្នុងការនាំចូល ៕
