ខេត្តកោះកុង ៖ សម្ដេចពិជ័យសេនា ទៀ បាញ់ ឧត្តមក្រុមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា នៅថ្ងៃទី១១ ខែ មេសា ឆ្នាំ២០២៤ បានអញ្ជើញ ជាអធិបតីភាព ក្នុងពិធីសម្ពោធដាក់ឱ្យប្រើប្រាស់ជាផ្លូវការ នៅសាលាបឋមសិក្សា សម្ដេចពិជ័យសេនា ទៀ បាញ់ ថ្មស មាន២ខ្នង កម្ពស់២ជាន់ ក្នុង១ខ្នងមាន១២បន្ទប់ ២ខ្នងស្មើនិង២៤បន្ទប់ មានទទឹង ៨ម៉ែត្រ បណ្ដោយ៥៣ ម៉ែត្រ ជាអំណោយអ្នកឧកញ៉ា លី យ៉ុងផាត់ និង លោក ជំទាវ គឹម ហ៊ាង ស្ថិតនៅក្នុង ភូមិថ្មស ឃុំថ្មស ស្រុកបូទុមសាគរ ខេត្តកោះកុង។
ក្នុងពិធីសម្ពោធសាលាបឋមសិក្សានេះ មានថ្នាក់ដឹកនាំជាន់ខ្ពស់ជាច្រើនរូបអញ្ជើញមកដែរ និងអាជ្ញាធរខេត្ត មន្ត្រីរាជការគ្រប់ស្ថាប័ន កងកម្លាំងទាំង៣ប្រភេទ ព្រះសង្ឃ សិស្សានុសិស្ស និងមានប្រជាជនមកចូលរួមចំនួន១២០០នាក់។
ក្នុងពិធីសម្ពោធ សម្ដេចពិជ័យសេនា ទៀ បាញ់ បានថ្លែងថា ក្នុងរយៈពេល៤៥ឆ្នាំកន្លងមកនេះ ក្រោមការដឹកនាំរបស់ដ៍ឈ្លាតវៃ របស់ប្រមុខរាជរដ្ឋាភិបាលកម្ពុជា បានធ្វើឲ្យប្រទេសកម្ពុជា ដែលជាប្រទេសធ្លាប់តែជាប្រទេសមានមហាវិនាស កម្ពុជាក៍ខ្លោចផ្សា វិនាសហិនហោច ព្រាត់ប្រាស បែកបាក់ខូចខាត ហេដ្ឋារចនាសម្ព័ន្ធស្ទើរអស់ក្នុងភ្លើងសង្គ្រាម។
សម្ដេចពិជ័យសេនា ទៀ បាញ់ បានថ្លែងបន្តថា ប្រទេសមានសន្តិភាព មានស្ថេរភាព មានសុវត្តិភាព ទើបមានការអភិវឌ្ឍលើគ្រប់វិស័យ ជាពិសេសថ្នាក់បណ្តុះបណ្តាលផ្នែកវិស័យអប់រំ គឺផ្នាលបណ្តុះបណ្តាលធនធានមនុស្ស បើគ្មានធនធានមនុស្សទេ ប្រទេសជាតិក៍គ្មានការរីកចម្រើនដែរ។
ដើម្បីឆ្លើយតបនិងរដ្ឋាភិបាល ប្អូនៗក្មួយៗ ត្រូវខិតខំយកចិត្តទុកដាក់ក្នុងការសិក្សា ជាចម្បងត្រូវគេចឲ្យផុតពីគ្រឿងញៀន ពីព្រោះកូនក្មួយចៅៗ គឺជា ទំពាំងស្នងឬស្សី។
សម្ដេចពិជ័យសេនា ទៀ បាញ់ ក៏រំលឹកពីប្រវត្តិសាស្ត្រនៅឃុំថ្មសនេះយ៉ាងជូរចត់បំផុត ទាំងសម្ដេចមកលាក់គេចខ្លួននៅទីនេះពីការប៉ុនប៉ងសម្លាប់សម្តេចកាល សម័យប៉ុលពត។ សម្ដេចពិជ័យសេនាបន្តថា ដូច្នេះយើងទាំងអស់គ្នារួមគ្នា ការពារសន្តិភាពឲ្យបានគង់វង្ស ត្រូវជឿជាក់ទៅលើរាជរដ្ឋាភិបាល ក្រោមការដឹកនាំរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អាណត្តិទី៧នេះ។
ក្នុងពិធីសម្ពោធសាលាបឋមសិក្សា សម្ដេចពិជ័យសេនា ទៀ បាញ់ បានកោតសរសើរយ៉ាងខ្លំាងចំពោះអ្នកឧកញ៉ា លី យ៉ុងផាត់ និងលោកជំទាវ គឹម ហ៊ាង ដែលបានជួយកសាងសមិទ្ធផលនានាយ៉ាងច្រើនក្នុងឃុំថ្មសនេះ ហើយសម្ដេចពិជ័យសេនាបានសសើរលោកជំទាវ ពិន នោង ជានារីវ័យឆ្លើមក្នុងការតស៊ូជាមួយសម្ដេច ជំនាន់ពលពតនោះដែរ ហើយលោកជំទាវ ពិន នោង ក៍បានជួយកសាងសមិទ្ធផលនានាក្នុងឃុំថ្មសជាច្រើនផងដែរ។
សាលាបឋមសិក្សាថ្មសធ្វើការសម្ភោធដាក់ឲ្យប្រើប្រាស់ជាផ្លូវការនូវអគារសិក្សាចំនួន០២ខ្នង កម្ពស់ពីរជាន់ ស្មើ២៤បន្ទប់ ដែលមួយខ្នងជាអំណោយដ៍ថ្លៃថ្លារបស់ សម្ដេចពិជ័យសេនា ទៀ បាញ់ ឧត្តមក្រុមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងលោកជំទាវ និងមួយខ្នងទៀតជាអំណោយដ៍ថ្លៃថ្លារបស់ អ្នកឧកញ៉ា លី យ៉ុងផាត់ និងលោកជំទាវ គឹម ហ៊ាង។ក្រៅពីអគារសិក្សាទាំងពីរនេះ ក៏មានអគារ និង សមិទ្ធផលនានាថ្មីៗបន្ថែមទៀតផងដែររួមមាន ទីចាត់ការ បណ្ណាល័យ របង ក្លោងទ្វារ តារាងបាល់ទះ ជាដើម ដែលបានចំណាយថវិកាអស់ប្រមាណ ៧៤៧.០០០ដុល្លារ អាមេរិក( ចិតសិបបួនម៉ឺន ប្រាំពីពាន់ ដុល្លារអាមេរិក) នេះជាសមិទ្ធផលនានាក្នុងឃុំថ្មស ស្រុកបូទុមសាគរ ខេត្តកោះកុង៕
