ខេត្តកំពង់ធំ ៖ នៅថ្ងៃទី១២ ខែវិច្ឆិកា ឆ្មាំ២០២០ មានសេចក្ដីរាយការណ៍ពីប្រជាពលរដ្ធមកថា នៅចំណុចភូមិរវៀង ឃុំងន ស្រុកសណ្ដាន់ ខេត្តកំពង់ធំ មានសកម្មភាពកាប់បំផ្លាញព្រៃឈើយ៉ាងវិនាសកម្ម ដោយមានការឃុបឃិតគ្នាជាប្រព័ន្ធ សកម្មភាពនេះធ្វើទៅបានដោយរលូនគ្មានការបង្ក្រាប ពីសំណាក់សមត្ថកិច្ចជំនាញនឹងអាផ្ញាធរដែនដីនោះ ។
ប្រជាពលរដ្ឋបានបន្តទៀតថា សកម្មភាពកាប់បំផ្លាញព្រៃឈើខាងលើនេះ គឺមានយូរណាស់មកហើយ ក៏ប៉ុន្តែគ្មានឃើញសមត្ថកិច្ចពាក់ព័ន្ធនិង ស្ថាប័នណាចុះមកបង្ក្រាបនោះទេ រីឯអាជ្ញាធរវិញនៅពេលដែលអ្នកសារព័ត៌មានតេទូរស័ព្ទទៅរាយការណ៍ជូនអំពីករណីកាប់បំផ្លាញព្រៃឈើយកមកធ្វើអុសដាក់ជាគំនរៗនៅតាមដងផ្លូវនៅចំណុចភូមិឃុំខាងលើ តែគួរអោយសោកស្ដាយអាផ្ញាធរបានឆ្លើយថាអុសនោះជាដើមស្វាយចន្ទីទេ។ ជាក់ស្ដែងសុទ្ធតែដើមឈើព្រៃចម្រុះមានតាំងពីដើមកកោះនិងដើមឈើគ្រប់មុខទៀតដែលឈ្មួញកំពុងតែដឹកជញ្ជូនចេញពីព្រៃយកមកស្តុកទុក ឡើងឡាន នៅក្នុងភូមិរវៀង ឃុំងន ស្រុកសណ្ដាន់ ខេត្តកំពង់ធំ នេះជាសកម្មភាពដែលប្រជាពលរដ្ឋ កំពុងតែមានការសោកស្ដាយយ៉ាងខ្លាំង ចំពោះព្រៃឈើចម្រុះកំពុងតែលើកដាក់លើឡានខ្នាតយក្សៗ (វេអង) គឺបំផ្លាញទាំងព្រៃឈើ បំផ្លាញទាំងផ្លូវថ្នល់ផងដែរ ព្រោះផ្ទុកមិនក្រោមពី៧០ទៅ៨០តោនទេ។
ជុំវិញនឹងបញ្ហាខាងលើនេះ បងប្អូនប្រជាពលរដ្ឋ សូមសំណូមពរទៅឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ សូមឯកឧត្តមមេត្តាចាត់វិធានការ មកលើមន្ត្រីដែលមានការពាក់ព័ន្ធជាមួយនឹងបទល្មើសព្រៃឈើនៅក្នុងស្រុកសណ្ដាន់ផងទាន ៕
