ខេត្តរតនគិរី ៖ កម្លាំងការិយាល័យនគរបាលប្រឆាំងបទល្មើសសេដ្ឋកិច្ចខេត្ត បានចុះបង្ក្រាបនិងរឹបអូសឈើប្រភេទស្រឡៅបានជាច្រើនកំណាត់ ក្រោយពីក្រុមឈ្មួញបានដឹកជញ្ជូនយកមកលាក់ទុករង់ចាំពេលវេលាល្អនិងដឹកបន្តទៅប្រទេសវៀតណាម លួចចូលតាមច្រករបៀងមួយចំនួនជាប់ព្រំដែន។
ប្រតិបត្តិការចុះបង្រ្កាបបទល្មើសធនធានធម្មជាតិមួយកន្លែង នៅវេលាម៉ោង៩និង៥នាទីព្រឹក កាលពីថ្ងៃទី១២ ខែវិច្ឆិកា ឆ្នាំ២០២០ ត្រង់ចំណុចក្នុងចម្ការស្វាយចន្ទីរ ស្ថិតនៅក្នុងភូមិឡុំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។
សមត្ថកិច្ចនគរបាលដែលចុះបង្ក្រាបបានឲ្យដឹងថា ការចុះបង្ក្រាបឈើនេះមានកម្លាំងនគរបាលសេដ្ឋកិច្ចខេត្ត សហការជាមួយកម្លាំងអធិការនគរបាលស្រុកអូរយ៉ាដាវ កម្លាំងបញ្ជាការផ្នែកសឹករងស្រុកអូរយ៉ាដាវ ក្នុងនោះដោយមានការសម្របសម្រួលពីលោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្តរតនគិរី បានធ្វើការចុះបង្រ្កាបបទល្មើសធនធានធម្មជាតិនិងបានរឹបអូសឈើប្រភេទស្រឡៅបានជាច្រើនកំណាត់ផងដែរ។
បច្ចុប្បន្នវត្ថុតាងត្រូវបានដឹកជញ្ជូនយកមករក្សាទុកនៅផ្នែករដ្ឋបាលព្រៃឈើស្រុកអូរយ៉ាដាវ ដើម្បីធ្វើកាវាស់វែងនិងចាត់បន្តតាមនីតិវិធីច្បាប់៕