ខេត្តព្រះវិហារ ៖ កម្លាំងសមត្ថកិច្ចជំនាញ កាលពីថ្ងៃទី១៦ មិថុនា ២០២១ វេលាម៉ោង១០និង៣២នាទី បានសហការបើកការស៊ើបអង្កេត ស្រាវជ្រាវ បង្ក្រាបករណីជួញដូរគ្រឿងញៀនឆ្លងដែនចូលពីឡាវមកកម្ពុជាតាមផ្លូវទឹក នៅចំណុចភូមិកំពង់ពោធិ៍ ឃុំកំពង់ស្រឡៅ១ ស្រុកឆែប ខេត្តព្រះវិហារ ។
សមត្ថកិច្ចបានឲ្យដឹងថា ប្រតិបត្តិការខាងលើនេះ កម្លាំងបានឃាត់ខ្លួនជនសង្ស័យ ០២នាក់ ៖ ១-ឈ្មោះ MOUAN VORLABOUD ភេទប្រុស អាយុ ៣៧ឆ្នាំ ជនជាតិឡាវ និង២-ឈ្មោះ កែវ ថា ភេទប្រុស អាយុ ៣៧ឆ្នាំ ជនជាតិ ឡាវ។ចំណែកវត្ថុតាងដកហូតបានរួមមាន សារធាតុញៀនប្រភេទមេតំហ្វេតាមីន(ICE)៥កញ្ចប់ធំ ទម្ងន់ ៤៩៨៨,៨៤ក្រាម និងមធ្យោបាយដឹកជញ្ជួនទូកយន្ត ១គ្រឿង ។
បច្ចុប្បន្ន ជនសង្ស័យ និងវត្ថុតាងខាងលើ បានបញ្ជូនទៅស្នងការដ្ឋាននគរបាលខេត្តព្រះវិហារ ដើម្បីកសាងសំណុំរឿងបន្តទៅសាលាដំបូងខេត្តព្រះវិហារតាមនីតិវិធី ៕
