ខេត្តបន្ទាយមានជ័យ ៖ យប់ថ្ងៃទី២៥ ឈានចូលថ្ងៃទី២៦ ខែឧសភា ឆ្នាំ២០២១ អនុវត្តន៍តាមបទបញ្ជាមេបញ្ជាការរបស់គណបញ្ជាការខេត្តបន្ទាយមានជ័យ ដាក់បទបញ្ជារយ៉ាងតឹងរឹង ការពារ នៅតាមបន្ទាត់ព្រំដែន ក្នុងការរឹតបន្តឹងសន្តិសុខព្រំដែនទប់ស្កាត់ពលករលួចឆ្លងដែន ជាពិសេសបានចាត់តាំងកម្លាំងចុះស៊ើបអង្កេតស្វែងរកមុខសញ្ញាមេខ្យល់ ចាប់ខ្លួនបញ្ជូនឲ្យសមត្ថកិច្ចជំនាញចាត់ការតាមផ្លូវច្បាប់។
ជនសង្ស័យជាមេខ្យល់បីនាក់ត្រូវបានសមត្ថកិច្ចចាប់ខ្លួននៅចំណុចភូមិព្រៃគប់ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ រួមជាមួយពលករខ្មែរចំនួន៤នាក់ ស្រីម្នាក់ បំរ៉ុងលួចឆ្លងដែនចូលប្រទេសថៃ ។
លោកវរសេនីយ៍ឯក មាស ប៊ុនរុន មេបញ្ជាការរង នាយសេនាធិការ តំបន់ប្រតិបត្តិការសឹករងខេត្ត ដែលសហការជាមួយ កងរាជអាវុធហត្ថស្រុក កម្លាំងចំរុះបានចាប់ខ្លួន មេខ្យល់ ១.ឈ្មោះ ជួន ចំណាប់ ភេទប្រុស អាយុ២៨ឆ្នាំ រស់នៅភូមិទំនប់ក៥ សង្កាត់ប៉ោយប៉ែត ក្រុងប៉ោយប៉ែត ២.ឈ្មោះ ចាន់ ស្រី ភេទស្រី អាយុ៣៤ឆ្នាំ រស់នៅភូមិព្រៃគប់ សង្កាត់ផ្សារកណ្ដាល ក្រុងប៉ោយប៉ែត ៣/ឈ្មោះ វី ចិត្រា ភេទប្រុស អាយុ៣២ឆ្នាំ រស់នៅភូមិប្រជាធម្មកើត សង្កាត់ផ្សារកណ្តាល ក្រុងប៉ោយប៉ែតខេត្តបន្ទាយមានជ័យ ។
សូមបញ្ជាក់ថា ចាប់តាំងពីកងកម្លាំងចំរុះខេត្ត ត្រូវបានបញ្ជូនទៅបំពេញប្រតិបត្តិការ សហការជាមួយកម្លាំងចម្រុះ ទប់ស្កាត់ពលករលួចឆ្លងដែន និងទប់ស្កាត់ការឆ្លងរីករាលដាល នៃជំងឺកូវីដ-១៩ បានឃាត់ខ្លួនពលករឆ្លងដែនបញ្ជូនទៅមណ្ឌលចត្តាឡីស័កជាបន្តបន្ទាប់ និងឃាត់ខ្លួនមេខ្យល់បានមួយចំនួន បញ្ជូនទៅសមត្ថកិច្ចជំនាញចាត់វិធានការតាមផ្លូវច្បាប់៕
