ខេត្តបន្ទាយមានជ័យ – បាត់ដំបង : ព្រះធម្មវនវាសីចន្ទ មុនី និងព្រះសង្ឃត្រូវរៀបចំអោយនិមន្តទៅមើលខ្សែបន្ទាត់ព្រំដែន បង្គោលព្រំដែនកម្ពុជា ថៃនោះ មកទល់ល្ងាចថ្ងៃទី២៥ខែសីហាឆ្នាំ២០២៤ នេះ បានឆ្លងកាត់ខេត្តបន្ទាយមានជ័យ បាត់ដំបង និងទៅដល់ប៉ៃលិនហើយ។
នៅភូមិសាស្ត្រខេត្តបន្ទាយមានជ័យក្បួនដង្ហែរបស់សង្ឃអង្គនេះ ត្រូវបានទទួលបដិសណ្ឋារកិច្ចដោយព្រះមេគណខេត្តនិងព្រះមន្ត្រីទាំងពីរគណ: ,លោកប្លែក វ៉ារី ប្រធានក្រុមប្រឹក្សាខេត្ត ,លោកអ៊ុំ រាត្រី អភិបាលខេត្តព្រមទាំងមន្ត្រីរាជការ កងកម្លាំង សមត្ថកិច្ច ប្រជាពុទ្ធបរិស័ទជាច្រើន។
ក្នុងនោះមានការនិមន្តសម្តែងទេសនាអប់រំចិត្តខ្លីៗនៅប្រាសាទបន្ទាយឆ្មារស្រុកថ្មពួក,នៅវត្តទួលពង្រក្រុងប៉ោយប៉ែត ព្រមទាំងនិមន្តទៅម្តុំផ្សារជិតច្រកព្រំដែនតំបន់បឹងត្រកួន, ផ្សារអូរបីជាន់ជិតច្រកអូរបីជាន់,ចូលទៅព្រំដែនមើលតម្រុយនៃបង្គោលព្រំដែននិងបង្គោលព្រំដែនលេខ៤៤ នាភូមិជោគជ័យ(ណងចាន់) ឃុំអូរបីជាន់ស្រុកអូរជ្រៅ ព្រមទាំងនៅវត្តនិងកន្លែងមួយចំនួនទៀតនាស្រុកម៉ាឡៃ។
នាឱកាសនោះ.ព្រះធម្មវនវាសីចន្ទ មុនី ក៏សូត្រធម៌ជាមួយអ្នកស្រុកបួងសួងសុំទឹកភ្លៀងសម្រាប់មនុស្ស សត្វបរិភោគ ផឹកនិង ប្រើប្រាស់ ព្រមទាំងស្រោចស្រពលើផែនដីនិងផលដំណាំផងដែរ។
នៅតំបន់នោះ មេឃក្តៅហួតហែង រាំងស្ងួតជិត៣សប្តាហ៍កន្លងមកហើយ ។
នាព្រលប់ថ្ងៃទី២៤ ខែសីហា បានទៅដល់ព្រំប្រទល់ស្រុកម៉ាឡៃ ខេត្តបន្ទាយមានជ័យ និងស្រុកសំពៅលូន ខេត្តបាត់ដំបង ហើយជិត១ថ្ងៃទី២៥ ខែសីហានេះ ព្រះអង្គក៏បំពេញបេសកកម្មលើការទេសនាអប់រំចិត្តសាស្ត្រនិងព្រំដែនដូចសកម្មភាពនៅបណ្តាខេត្តភាគឦសាន្ត ព្រំដែនកម្ពុជា វៀតណាមនិងខេត្តមួយចំនួនទៀតតាមបន្ទាត់ព្រំដែនកម្ពុជា ឡាវនិងកម្ពុជា ថៃ។
លុះដល់រសៀលថ្ងៃទិ២៥ខែសីហា ប្រតិភូបានឆ្លងកាត់ព្រំប្រទល់ស្រុកកំរៀង ខេត្តបាត់ដំបង ចូលស្រុកសាលាក្រៅ ខេត្តប៉ៃលិនហើយ ។
នៅថ្ងៃទិ២៦ ខែសីហា ក្បួននេះនឹងបន្តដំណើរតាមព្រំដែនក្នុងភូមិសាស្ត្រខេត្តប៉ៃលិន បាត់ដំបងនិងពោធិសាត់ រួចឆ្ពោះទៅខេត្តកោះកុងទៀត ៕
