នាថ្ងៃទី៤ ខែមេសា ឆ្នាំ២០២៤នេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានផ្ញើសារថ្លែងអំណរគុណដល់ ប្រជាពលរដ្ឋទាំងអស់ ដែលចេញមកការពារភាពត្រឹមត្រូវ ស្អាតស្អំ របស់លោកជំទាវ ដែលរងគ្រោះដោយអយុត្តិធម៌ ដោយសារព័ត៌មាន The Cambodia Daily កាលពីថ្ងៃទី ០២ ឧសភា កន្លងមកនេះ។
លោកជំទាវបណ្ឌិត បានបន្តថា លោកជំទាវពិតជាមានការរំភើបណាស់ ដែលបងប្អូន រួមទាំងអ្នក ដែលបានធ្វើការងារជាមួយលោកជំទាវកន្លងមក ព្រមទាំងបងប្អូនភាគច្រើន បានតាមដានសកម្មភាព និងការងារសង្គមរបស់លោកជំទាវ មានការស្រលាញ់រាប់អាន និងជឿជាក់លើលោកជំទាវ។
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត គូសរំលេចថា ការគាំទ្រ ស្រលាញ់នឹងការពារលោកជំទាវនេះ គឺជាកំលាំងចិត្តមួយដ៏សំខាន់ដើម្បីជួយដល់លោកជំទាវក្នុងការបន្តនូវសកម្មភាពមនុស្សធម៌នេះបន្តទៅមុខទៀត។
គួរម្លឹកផងដែរថា កាលពីថ្ងៃទី២ ខែមេសា កន្លងទៅនេះ អគ្គនាយកដ្ឋានគយ និងរដ្ឋាករកម្ពុជា បានចេញសេចក្ដីបដិសេធយ៉ាងដាច់អហង្ការទៅលើការចុះផ្សាយរបស់សារព័ត៌មាន «The Cambodia Daily» ដែលបានលើកឡើងយ៉ាងងងឹតងងល់ និងជាការមួលបង្កាច់យ៉ាងព្រៃផ្សៃថា ឯកឧត្តម គុណ ញឹម បានសូកប៉ាន់លោកជំទាវបណ្ឌិត ពេជ ចន្ទមុន្នី ភរិយាលោក ហ៊ុន ម៉ាណែត ដើម្បីសុំពន្យារពេលកាន់តំណែង៣ឆ្នាំទៀត។
អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា ការលើកឡើងមួលបង្កាច់យ៉ាងងងើល និងអគតិបែបនេះ គឺសំដៅធ្វើឱ្យប៉ះពាល់ដល់កិត្តិយស និងសេចក្ដីថ្លៃថ្នូររបស់ថ្នាក់ដឹកនាំតែម្ដង។
គួរបញ្ជាក់ថា នេះមិនមែនជាលើកទី១ទេ ដែលកាសែត The Cambodia Daily និងបុគ្គលស៊ីឈ្នួលឱ្យបរទេសបម្រើកាសែតនេះ បានវាយប្រហារដោយមួលបង្កាច់មកលើមន្ត្រីរាជរដ្ឋាភិបាល និងស្ថាប័នរដ្ឋនានា ហើយការមួលបង្កាច់ដោយងងើលដដែលៗ ក៏បង្ហាញឱ្យកាន់តែច្បាស់ពីចរិត និងធាតុពិតនៃកាសែតនេះ ដែលជាឧបករណ៍ប្រឆាំងផ្កាប់មុខ ស្មោកគ្រោក អសីលធម៌ និងមួលបង្កាច់គ្មានរើសមុខ និងគ្រប់រឿង៕
