ខេត្តបន្ទាយមានជ័យ ៖ រថយន្តតូចរបស់លោកនាយសេនាធិការកងពលលេខ៥១ បុកបាក់បង្គោលភ្លើងធំខ្សែបញ្ជូនតង់ស្យុងខ្ពស់ បណ្តាលអោយលោករងរបួសធ្ងន់ហើយត្រូវបញ្ជូនទៅនិងបន្តសង្គ្រោះព្យាបាល។ចំណែក ក្រុមហ៊ុន(ខ្សែបញ្ជូនចរន្តតង់ស្សុងខ្ពស់១១៥គីឡូវ៉ុល )ត្រេនមីសិន ឡាញ : CPTL ) ពិនិត្យនូវការទារសំណងខូចខាត។
សួមរំលឹកថា គ្រោះថ្នាក់នោះកើតឡើងកាលពីម៉ោង៥និង៣០នាទី ល្ងាចថ្ងៃទី១០ ខែធ្នូ ឆ្នាំ២០២០ លើកំណាត់ផ្លូវជាតិលេខ៥ ចំណុចដើមពោធិ៍២ដើម ភូមិសុរិយាថ្មី ឃុំកូប ស្រុកអូរជ្រៅ ខេត្តបន្ទាយមានជ័យ ។
លោកវរសេនីយ៍ សេស វិបុល អធិការនគរបាលស្រុកអូរជ្រៅបានអោយដឹងថា៖ រថយន្តឃ្លុបព៌ណត្រអ៊ី ពាក់ស្លាកលេខ ខេមរៈភូមិន្ទ 07,2-3405 បើកបរម្នាក់ឯងដោយឧត្តមសេនីយ៍ត្រី ជុំ សេដ្ឋា មេបញ្ជាការរងនិងជានាយសេនាធិការកងពលតូចថ្មើរជើងលេខ៥១ ក្នុងល្បឿនលឿនពីទិសខាងកើតទៅលិច ។
ដល់កន្លែងកើតហេតុ លោកបានឡើងជែងរថយន្តមួយទៀតក្នុងទិសស្រប តែត្រូវជួបឧបសគ្គ ក៏ស្លន់ស្លោរ រួចក៏បានរេចង្កូតធ្លាក់ផ្លូវទៅបុកបង្គោលភ្លើងធំ( ខ្សែបញ្ជូនតង់ស្យុងខ្ពស់១១៥គីឡូវ៉ុល របស់ក្រុមហ៊ុនត្រេនមីសិន ឡាញ : CPTL ) បណ្តាលអោយបង្គោល១ដើមបាក់ដល់ដី ប៊ិះសង្កត់ផ្ទះពលរដ្ឋនៅម្តុំនោះ ។ ហើយក៏ទាញបង្គោលភ្លើងនៅជាប់នោះអោយទ្រេតដែរ ។ក្នុងគ្រោះថ្នាក់នោះថយន្តបង្កបានខូចខាតផ្នែកខាងមុខ យ៉ាងដំណំ ។
ក្នុងគ្រោះថ្នាក់នោះ លោកជុំ សេដ្ឋា បានរងរបួសធ្ងន់ ហើយត្រូវបាននគរបាល យោធានិងក្រុមអ្នកសង្គ្រោះដឹកបញ្ជូនទៅសង្គ្រោះព្យបាលនៅមន្ទីរពេទ្យខេត្តមិត្តភាពកម្ពុជា ជប៉ុន មង្គលបូរី ឬអាចបន្តទៅពេទ្យនៅខេត្តបាត់ដំបង ។ឯរថយន្តលោកត្រូវនាំទៅរក្សាទុកបណ្តោះអាសន្ននៅអធិការដ្ឋាននគរបាលស្រុក អូរជ្រៅ។
មន្ត្រីអគ្គីសនីនៅខេត្តបន្ទាយមានជ័យបានអោយដឹងថា ៖ នៅពេលបង្គោលភ្លើងខ្សែបញ្ជូនតង់ស្រុងខ្ពស់ដួលរលំ ពុំមានទុស្សេឬឆ្លងចរន្តឆក់ពលរដ្ឋនៅតាមផ្ទះដែលបង្គោលដួលលើនិងអ្នកធ្វើដំណើរតាមផ្លូវជាតិលេខ៥ ឡើយ ប៉ុន្តែបានបង្កកាត់ផ្តាច់ចរន្តអគ្គិសនីក្នុងរយៈពេលខ្លី ។
ទោះយ៉ាងណា ក្រុមហ៊ុនអគ្គិសនីខាងលើនឹងពិនិត្យ ហើយទាមទារសំណងការខូចខាតពីលោក ជុំ សេដ្ឋា ផងដែរនៅក្រោយលោកបានធូរស្បើយ ៕
