ខេត្តកំពង់ឆ្នាំង ៖ នៅព្រឹកថ្ងៃទី០៣ ខែកក្កដា ឆ្នាំ២០២២ នេះ វេលាម៉ោង១១:១៥នាទី ផ្នែករដ្ឋបាលព្រៃឈើកំពង់ត្រឡាច សហការជាមួយកម្លាំងការពារចម្ការឈើព្រៃដាំ បានចុះប្រតិបត្តិការនៅតំបន់ ដំណាក់ស្វាយ ក្នុងភូមិក្តុរអភិវឌ្ឍន៍ ឃុំស្វាយជុក ស្រុកសាមគ្គីមាជ័យ ឃាត់ខ្លួនជនសង្ស័យ២នាក់ពាក់ព័ន្ធករណី ឈូសឆាយដីចម្ការព្រៃដាំប្រភេទអាកាស្យា។
ការឃាត់ខ្លួនជនសង្ស័យនេះដោយមានការសម្របសម្រួលនីតិវិធីពីឯកឧត្តម អ៊ិត សុធា ព្រះរាជអាជ្ញាអមសាលាដំបូងខេត្ត ក្រោយកម្លាំងផ្នែករដ្ឋបាលព្រៃឈើកំពង់ត្រឡាច សហការជាមួយកម្លាំងការពារចម្ការឈើព្រៃដាំ បានចុះប្រតិបត្តិការនៅតំបន់ ដំណាក់ស្វាយ ប្រទះឃើញកំពុងធ្វើសកម្មភាពជាក់ស្តែង។
ជនសង្ស័យដែលត្រូវសមត្ថកច្ចឃាត់ខ្លួនឈ្មោះ ពែក បូរៀម ភេទប្រុសអាយុ២២ឆ្នាំ អ្នកបើកត្រាក់ទ័រនិងឈ្មោះ តូច ខុម ភេទប្រុស អាយុ៦៩ឆ្នាំ ជាម្ចាស់ត្រាក់ទ័រ ដោយមានអ្នកជួលឈ្មោះ ហេង ភេទប្រុស និងប្អូនឈ្មោះ ល័ក្ខ ភេទស្រី រស់នៅភូមិក្តុរអភិវឌ្ឍ ហើយអ្នកមកចង្អុលអោយឈូស មានមេភូមិមិនស្គាល់ឈ្មោះ និងឈ្មោះឌឿន ជារងភូមិក្តុរអភិវឌ្ឍន៍ ឃុំស្វាយជុក អោយគាត់ឈូសទំហំ៩ហ.ត ។
ក្រុមការងារចុះប្រតិបត្តិការខាងលើមិនទាន់បានគណនាទំហំដីនៅឡើយ ។
បច្ចុប្បន្នជនសង្ស័យ និងត្រាក់ទ័របានយកមករក្សាទុកនៅស្នាក់ការផ្នែករដ្ឋបាលព្រៃឈើកំពង់ត្រឡាច អនុវត្តបន្តតាមនីតិវិធីនៃច្បាប់ស្តីពីព្រៃឈើ 
