អន្តរជាតិ ៖ ក្រុមអ្នកជួយសង្គ្រោះប្រទេសនេប៉ាល់ នៅថ្ងៃច័ន្ទនេះ បានរកឃើញសាកសពមនុស្សចំនួន ១៤ នាក់ ជាមួយនឹងបំណែកយន្តហោះធុនតូចមួយគ្រឿងដែលដឹកមនុស្ស ២២ នាក់ ហើយបានធ្លាក់។ នេះបើយោងតាមរបាយការណ៍របស់សារព័ត៌មាន Reuters ។
ក្រុមហ៊ុនឯកជន Tara Air បានឲ្យដឹងថា យន្តហោះនេះបានធ្លាក់ចុះ កាលពីថ្ងៃអាទិត្យ អំឡុងពេលអាកាសធាតុមានពពកក្រាស់ ហើយត្រូវបានរកឃើញដោយកងទ័ពរបស់ប្រទេសនេប៉ាល់ នៅថ្ងៃច័ន្ទនេះ បន្ទាប់ពីប្រតិបត្តិការស្វែងរកដែលត្រូវបានផ្អាក ចាប់ផ្ដើមបន្តឡើងវិញ។
ទន្ទឹមនោះ លោក Deo Chandra Lal Karna អ្នកនាំពាក្យអាជ្ញាធរអាកាសចរណ៍ស៊ីវិលនេប៉ាល់ បាននិយាយថា ប្រតិបត្តិការស្វែងរកអ្នកដែលនៅរស់រានមានជីវិត គឺមានភាគរយតិចណាស់។
គួរបញ្ជាក់ថា យន្តហោះ De Havilland Canada DHC-6-300 Twin Otter នេះ បានហោះចេញពីទីក្រុងទេសចរណ៍ Pokhara ចម្ងាយ ១២៥ គីឡូម៉ែត្រ (៨០ ម៉ាយ) ភាគខាងលិចនៃទីក្រុង Kathmandu កាលពីព្រឹកថ្ងៃអាទិត្យ ហើយគោលដៅគឺឆ្ពោះទៅតំបន់ Jomsom ដែលជាកន្លែងទេសចរណ៍ ដែលមានចម្ងាយប្រហែល ៨០ គីឡូម៉ែត្រ (៥០ ម៉ាយ) ភាគពាយព្យនៃទីក្រុង Pokhara ដែលជាធម្មតាការហោះហើររយៈពេល ២០ នាទី ខណមន្ត្រីអាកាសចរណ៍ បញ្ជាក់ថា យន្តហោះនេះ បានបាត់ការទាក់ទងអំឡុងពេលមុនចុះចត ៥ នាទី៕