ខេត្តកំពង់ចាម ៖ លំនៅឋានបងប្អូ ប្រជាពលរដ្ឋ ១ខ្នង រួមនឹងតូបលក់ដូរចំនួន ១៦តូប ត្រូវ បានអគ្គីភ័យលេបត្របាក់ទាំងស្រុង ករណីគ្រោះ អគ្គីភ័យនេះ បានកើតមានឡើង កាលពីវេលាម៉ោង ៩ និង ៤០នាទី យប់ថ្ងៃទី៣ ខែកុម្ភះ ឆ្នាំ២០២២ នៅចំណុចខាងលិចផ្សារស្ពឺ ស្ថិតក្នុងភូមិស្ពឺកើត ឃុំស្ពឺ ស្រុកចំការលើ ខេត្តកំពង់ចាម ។
សមត្ថកិច្ចបានឲ្យដឹងថា បន្ទាប់ពីទទួលបានពត៌មានពីប្រជាពលរដ្ឋរាយការណ៍ថាមានករណី គ្រោះអគ្គីភ័យកើតឡើងភ្លាម លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានបញ្ជាឲ្យលោកវរសេនីយ៍ឯក ប៉ែន ទៀងចំរើន អធិការនគរបាលស្រុកចំការលើ ដឹកនាំកម្លាំង ជំនាញ និងរថយន្ដពន្លត់អគ្គីភ័យចំនួន ១គ្រឿង ចុះទៅអន្ដរាគមន៍ជួយពន្លត់ ស្របពេលជាមួយគ្នានេះ លោកឧត្តមសេនីយ៍ស្នងការ ក៏បានបញ្ជាឲ្យរថយន្ដពន្លត់អគ្គីភ័យរបស់ស្នងការដ្ឋានចំនួន ២គ្រឿង រថយន្ដពន្លត់អគ្គីភ័យរបស់ស្រុកកំពង់សៀមចំនួន ១គ្រឿង រថយន្ដពន្លត់អគ្គីភ័យរបស់ស្រុកស្ទឹងត្រង់ចំនួន ២គ្រឿង និងរថយន្ដពន្លត់អគ្គីភ័យរបស់ស្រុកព្រៃឈរចំនួន ១គ្រឿង ដើម្បីចេញទៅជួយអន្តរាគមន៍ពន្លត់ និងបង្ការទប់ស្កាត់ កុំឲ្យឆាបឆេះរាលដាលដល់ផ្ទះរបស់ប្រជាពលរដ្ឋផ្សេងទៀត ។
សមត្ថកិច្ចបានឲ្យដឹងថា នៅក្នុងកិច្ចប្រតិបត្តិការណ៍នេះ កម្លាំងជំនាញ បានពន្លត់ភ្លើងឲ្យរលត់មួយរយភាគរយ និងគ្រប់គ្រងស្ថានភាពបានទាំងស្រុងអស់រយ:ពេលជាច្រើនម៉ោង ឈានចូលថ្ងៃទី៤ ខែកុម្ភៈ ឆ្នាំ២០២២ ដោយប្រើប្រាស់រឡានទឹកអស់ចំនួន ៧គ្រឿង និងទឹកអស់ចំនួន ១៦រថយន្ត ។
សមត្ថកិច្ចបានបញ្ជាក់ថា ករណីគ្រោះ អគ្គីភ័យនេះ បណ្តាលឲ្យមានការខូចខាតទ្រព្យសម្បត្តិ និងសម្ភារៈ ដែលមានដូចជា ផ្ទះ ១ខ្នង ទំហំ ៧ម៉ត្រ × ១០ម៉ែត្រ (ឆេះអស់ទាំងស្រុង) សង់អំពីថ្មប្រក់ក្បឿង ជញ្ជាំងដែក ថ្មក្រោម ម្ចាស់ឈ្មោះ ហេ វណ្ណី ភេទស្រី អាយុ៧០ឆ្នាំ នៅភូមិស្ពឺកើត ឃុំស្ពឺ ស្រុកចំការលើ ខេត្តកំពង់ចាម ។ តូបចំនួន១៦តូប (ទំហំ៤ម x ៦ម) តូបសង់ពីដែក ជញ្ជាំងដែក ថ្មក្រោម ប្រក់ដែក។
ចំពោះមូលហេតុ សមត្ថកិច្ចបានដាក់ការសង្ស័យថា មកពីឆ្លងចរន្តអគ្គិសនី ទោះជាយ៉ាងណា ករណីនេះមិនបណ្ដាលឲ្យរងរបួសដល់មនុស្សឡេីយ ៕