ខេត្តកំពង់ឆ្នាំង ៖ នៅព្រឹកថ្ងៃទី២៣ ខែមករា ឆ្នាំ២០២២ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន និង លោកជំទាវ រួមដំណើរប្រតិភូក្រសួងព័ត៌មាន និង ឯកឧត្តម ឡុង ឈុនឡៃ ប្រធានក្រុមប្រឹក្សាខេត្តកំពង់ឆ្នាំង ឯកឧត្តម ស៊ីវ រុន សមាជិកក្រុមប្រឹក្សាខេត្ត ឯកឧត្តម ម៉ម ឈឿម ទីប្រឹក្សាក្រសួងព័ត៌មាន និង ប្រធានមន្ទីរមន្ទីរព័ត៌មានខេត្តកំពង់ឆ្នាំង លោក យិន សាវេន អភិបាលក្រុងកំពង់ឆ្នាំង ព្រមទាំងថ្នាក់ដឹកនាំមន្រ្តីរាជការ មន្ទីរព័ត៌មានខេត្តកំពង់ឆ្នាំង បានអញ្ជើញ ចូលរួមគោរពវិញ្ញាណក្ខន្ធសព ឯកឧត្តម សូ រិន អតីអភិបាលខេត្តកំពង់ឆ្នាំង និង ជាឳពុកក្មេក ឯកឧត្តម គុយ ចន្ថា សមាជិកក្រុមប្រឹក្សាខេត្ត ស្ថិតនៅភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ដែលបានទទួលមរណៈភាព ដោយរោគាពាធ ក្នុងជន្មាយុ៨១ឆ្នាំ។
ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានមានប្រសាសន៍ សំដែងនូវការចូលរួមរំលែកទុក្ខ យ៉ាងក្រៀមក្រំចំពោះបងប្អូន កូន ចៅ និង ក្រុមគ្រួសារសព ឯកឧត្តម សូ រិន ដោយសមាណចិត្តដ៏សែនក្តុកក្តួលជាទីបំផុត និងសូម ឧទ្ទិស បួងសួង ដល់វិញ្ញាណក្ខន្ធ របស់ឯកឧត្តម សូ រិន បានទៅកាន់ សុខកតិភពកុំបីឃ្លៀងឃ្លាតឡើយ។
ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានមានប្រសាសន៍បន្តថាៈ មរណភាពរបស់ឯកឧត្តម សូ រិន នាពេលនេះ គឺជាការបាត់បង់ បិតា បិតាក្មេក ជីតា ជីតាទួតជាទីគោរពស្រឡាញ់ដ៏ជ្រាលជ្រៅបំផុត របស់ក្រុមគ្រួសារនៃសព ប្រកបដោយព្រហ្មវិហារធម៌ សង្គហធម៌ សណ្តោសប្រណី ដោយកន្លងមក ឯកឧត្តម តែងតែយកអស់កម្លាំងកាយ ចិត្ត ប្រាជ្ញាស្មារតី ចិញ្ចឹមបីបាច់ថែរក្សាក្រុមគ្រួសារ និងអប់រំ ទូន្មានកូនចៅ ធ្វើអោយក្រុមគ្រួសាររស់នៅ មានភាពរីករាយ និង សុភមង្គល ។ ការបាត់បង់នាពេលនេះ គឺជាការបាត់បង់នូវឥស្សរជនដ៏ឆ្នើម១រូប ដែលពេញមួយជីវិតរបស់ឯកឧត្តម បានរួមចំណែកយ៉ាងសកម្មក្នុងកិច្ចការបម្រើជាតិមាតុភូមិ ប្រកបដោយស្មារតីទទួលខុសត្រូវខ្ពស់ ៕
