ខេត្តរតនគិរី ៖ លោក ញ៉ែម សំអឿន អភិបាល នៃគណៈអភិបាលខេត្តរតនគិរី បានអញ្ជើញជាអធិបតីភាព ក្នុងពិធីប្រកាសផ្ទេរភារកិច្ចប្រធានស្នាក់ការត្រួតពិនិត្យច្រកទ្វារព្រំដែនអន្តរជាតិអូរយ៉ាដាវ នៃខេត្តរតនគិរី ដោយមានការចូលរួម ពីលោកមេបញ្ជាការកងកម្លាំងប្រដាប់អាវុធទាំងបីប្រភេទ ថ្នាក់ដឹកនាំខេត្ត ប្រធានមន្ទីរអង្គភាពជុំវិញខេត្ត ព្រមទាំងអាជ្ញាធរស្រុកអូរយ៉ាដាវផងដែរ នាព្រឹកថ្ងៃអង្គារ៍ ៥រោច ខែអស្សុជ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៦ ខែតុលា ឆ្នាំ២០២១ នៅទីស្នាក់ការត្រួតពិនិត្យច្រកទ្វារព្រំដែនអន្តរជាតិអូរយ៉ាដាវ។
លោក ញ៉ែម សំអឿន អភិបាលខេត្តរតនគិរី បានមានប្រសាសន៍ថា ពិធីប្រកាសផ្ទេរភារកិច្ចរបស់លោក កង សារឿន ប្រធានស្នាក់ការច្រកទ្វារព្រំដែនអន្តរជាតិអូរយ៉ាដាវ ឲ្យទៅកាន់មុខតំណែងជាអភិបាលស្រុកអណ្ដូងមាស នឹងតែងតាំងលោក សាយ ចំរើន ជាប្រធានស្នាក់ការច្រកទ្វារព្រំដែនអន្តរជាតិអូរយ៉ាដាវ វិញ។
នាឱកាសនោះ លោកអភិបាលខេត្តរតនគិរី បានបញ្ជាក់ថា ការផ្ទេរភារកិច្ច និងប្រគល់ភារកិច្ចប្រធានស្នាក់ការច្រកទ្វារទ្វេរភាគីព្រំដែន គឺដើម្បីធ្វើការផ្លាស់ប្ដូរបទពិសោធគ្នាទៅវិញទៅមក និងដើម្បីជំរុញឲ្យមានការអភិវឌ្ឍន៍នៅតាមច្រកទ្វារព្រំដែន ព្រោះថា ប្រធានទីស្នាក់ការច្រកទ្វារព្រំដែននីមួយៗ គឺមានអាណត្តិរយៈពេល២ឆ្នាំ ដែលក្រសួងមហាផ្ទៃបានកំណត់។
លោកអភិបាលខេត្ត ក៏បានណែនាំដល់ ប្រធានទីស្នាក់ការច្រកទ្វារព្រំដែនអន្តរជាតិអូរយ៉ាដាវ ត្រូវចេះសហការគ្នា ជាមួយសមត្ថកិច្ច និងពង្រឹងកិច្ចសហប្រតិបត្តិការរវាងខេត្តជាប់ព្រំដែន ដើម្បីរួមគ្នារក្សាសន្តិសុខសណ្តាប់ធ្នាប់ នឹងលុបបំបាត់បទល្មើសនានា។
លោក សាយ ចំរើន ប្រធានទីស្នាក់ការច្រកទ្វារព្រំដែនអន្តរជាតិ ថ្មី ឡើងមានមតិប្តេជ្ញាចិត្ត ដូចខាងក្រោម៖
១. ស្មោះត្រង់ចំពោះជាតិសាសនាព្រះមហាក្សត
២. បន្តពង្រឹងទំនាក់ទំនងសាមគ្គីភាព និងសហប្រតិបត្តិការល្អរវាងខេត្តជាប់ព្រំដែន
៣. បន្តការអនុវត្តទប់ស្កាត់រាល់បទល្មើសឆ្លងដែនខុសច្បាប់
៤. បន្តការខិតខំយកចិត្តទុកដាក់ ពង្រឹងការងារបង្ការ ទប់ស្កាត់ ប្រយុទ្ធនឹងការរីករាលដាលនៃជំងឺកូវីដ-១៩ ដោយជំរុញឲ្យបានខ្ជាប់ខ្ជួននូវគោលការណ៍ណែនាំរបស់រាជរដ្ឋាភិបាលជាពិសេសវិធានការ ៣កុំ ៣ការពារព្រមទាំងប្រធានការរបស់ក្រសួងសុខាភិបាល
៥. ពង្រឹងសាមគ្គីភាព ឯកភាពផ្ទៃក្នុងជាមួយគ្រប់ថ្នាក់ គ្រប់ផ្នែក និងអ្នកពាក់ព័ន្ធទាំងអស់ ដើម្បីចូលរួម ចំណែក និងអនុវត្តរក្សាឲ្យបាននូវស្ថេរភាព សន្តិសុខ សណ្តាប់ធ្នាប់សង្គម និងការអភិវឌ្ឍន៍ ប្រកប ដោយចីរភាព សំដៅលើកកម្ពស់កម្រិតជីវភាពរស់នៅ និងកាត់បន្ថយភាពក្រីក្ររបស់ ប្រជាពលរដ្ឋ ស្របតាមគោល នយោបាយរបស់រាជរដ្ឋាភិបាលកម្ពុជា៕