ខេត្តឧត្តរមានជ័យ ៖ អតីតយុទ្ធជនដែលកំពុងរស់នៅលើដីសម្បទានសង្គមកិច្ចខេត្តឧត្តរមានជ័យចំនួន១៥៥គ្រួសារទទួល អំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈឯកឧត្តម ប៉ែន កុសល្យ អភិបាលនៃគណៈអភិបាលខេត្តឧត្តរមានជ័យ ។ ពិធីនេះធ្វើឡើងនៅរសៀលថ្ងៃទី២៦ ខែសីហា ឆ្នាំ២០២១ ដែលស្ថិតក្នុងភូមិស្រះទឹកតេជោសែនជ័យ ឃុំចុងកាល់ ស្រុកចុងកាល់ ខេត្តឧត្តរមានជ័យ ។
ក្នុងឪកាសនេះដែរ ឯកឧត្តម ប៉ែន កុសល្យ អភិបាលខេត្តឧត្តរមានជ័យបានថ្លែង ពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា ដែលជានិច្ចកាល សម្តេចតែងតែយកចិត្តទុកដាក់គិតគូរពីសុខទុក្ខនិងជីវភាពរស់នៅរបស់បងប្អូនអតីតយុទ្ធជនគ្រប់ពេលវេលា ជាពិសេសក្នុងកាលៈទេសៈដែលពិភពលោកនិងប្រទេសជាតិកំពុងរងគ្រោះដោយការឆ្លងរីករាលដាលមេរោគ គូវីដ ១៩ ។
ឯកឧត្តមអភិបាលខេត្ត ក៍បាន អំពាវនាវឱ្យបងប្អូនយើងជាអតីយ យុទ្ធជន ត្រូវអនុវត្តតាមការណែនាំរបស់ក្រសួងសុខាភិបាល ដើម្បីការពារខ្លួនពីជំងឺគូវីដ ១៩ និងត្រូវថែទាំសុខភាព ឲ្យបានល្អ។
ឯកឧត្តមអភិបាលខេត្តក៏បាននាំយកនូវគ្រឿងឧបភោគបរិភោគក្នុងមួយគ្រួសារទទួលបាន អង្ករ ២៥គីឡូ ក្រាម មី១កេស ត្រីខ១ យួរ ទឹកស៊ីអ៊ុវ ១យួរ ប៊ីចេង ១ថង់ អំបិល ១ថង់ និងសំភារៈប្រើប្រាស់មួយចំនួនផងដែរ។
បងប្អូនអតីតយុទ្ធជនបានគោរពអំណរអរគុណសម្តេចតេជោហ៊ុនសែន ដែលបានផ្ដល់ទាំង ដីធ្លី ទាំងផ្ទះថ្មី និងគ្រឿងឧបភោគបរិភោគ សម្រាប់ពួកគាត់រស់នៅតាមរយៈ ឯកឧត្តមទេសរដ្ឋមន្ត្រី គន់ គីម និងឯកឧត្តម ប៉ែន កិសល្យ អភិបាលនៃគណៈអភិបាលខេត្តឧត្តរមានជ័យ ដែលបានចាត់តាំងបណ្ដាលមន្ទីរអង្គភាពជុំវិញខេត្ត ឲ្យចងសម្ព័ន្ធមេត្រីភាព ដើម្បីមើលថែទាំ ពីសុខទុក្ខនិងជីវភាពរស់នៅរបស់ពួកគាត់ថែមទៀតផង៕