ខេត្តព្រះវិហារ ៖ កាលពីថ្ងៃទី៣០ ខែឧសភា ឆ្នាំ២០២១ សមត្ថកិច្ចខេត្តព្រះវិហារ បានចុះបង្ក្រាបករណីកាប់ទន្ទ្រានរុករានយកដីរដ្ឋទៅធ្វើជាកម្មសិទ្ធិខុសច្បាប់នៅភូមិស្រយ៉ងត្បូង ឃុំស្រយ៉ង ស្រុកគូលែន ខេត្តព្រះវិហារ តាមការអូសទាញ និងបំផុសបំផុលពីសំណាក់ក្រុមមេខ្យល់ ខណៈដែលប្រតិបត្តិការនោះ សមត្ថកិច្ចបានឃាត់ខ្លួនពលរដ្ឋចំណាក់ស្រុកមកពីបណ្តាខេត្តផ្សេងៗ ចំនួន១៧នាក់ ។
បន្ទាប់ពីធ្វើការណែនាំអប់រំ សមត្ថកិច្ចបានឲ្យពលរដ្ឋទាំងអស់នោះត្រឡប់ទៅផ្ទះវិញ និងឱ្យពួកគាត់ព្រមទទួលធ្វើកិច្ចសន្យាបញ្ឈប់រាល់សកម្មរុករានដីព្រៃរបស់រដ្ឋ ដែលច្បាប់ហាមឃាត់ និងឈប់ជឿតាមកាអូសទាញរបស់មេខ្យល់តទៅទៀតដែរ ។ ចំណែកជនសង្ស័យជាមេខ្យល់ចំនួន៣នាក់ក្នុងចំណោមប្រជាពលរដ្ឋទាំង១៧នាក់ សមត្ថកិច្ចកំពុងស្រាវជ្រាវនិងប្រមូលភស្តុតាង ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធីបន្តទៀត ៕