ខេត្តកំពង់ឆ្នាំង ៖ នៅរសៀលថ្ងៃ ទី១៧ ខែឧសភា ឆ្នាំ២០២១ វេលាម៉ោង៩ និង៣០ នាទីយប់ នៅត្រង់ចំណុចភូមិចក ឃុំច្រេស ស្រុកកំពង់ត្រឡាច ខេត្តកំពង់ឆ្នាំង មានករណីអគ្គិភ័យមួយបានកើតបណ្ដាលឲ្យឆេះផ្ទះ ចំនួន០២ខ្នង និងរងការខូចខាត។
យោងតាមការបញ្ជាក់ពីសមត្ថកិច្ចមូលដ្ឋានបានឱ្យដឹងថា ផ្ទះទី១.មានទំហំ ៧ × ៩ ម៉ែត្រ ជញ្ជាំងឈើ ដំបូលស៊ីប្រូ ម្ចាស់ផ្ទះឈ្មោះ ប៉ែន សាវ៉េត ភេទស្រី អាយុ៥២ ឆ្នាំ (ឆេះទាំងស្រុង) និងខូចខាតសម្ភារៈរួមមាន:- ម៉ូតូ០១ គ្រឿង ស្រូវ២.៥តោន ម៉ាស៊ីនបូមទឹក០៣ គ្រឿង និងផ្ទះទី២ មានទំហំ ៨ × ៦ ម៉ែត្រ ម្ចាស់ផ្ទះឈ្មោះ សោម ជន ជញ្ជាំងឈើ ដំបូលក្បឿង (ឆេះជញ្ជាំងអស់មួយចំហៀង)។
យោងតាមការបញ្ជាក់ពីអាជ្ញាធរ ការឆេះផ្ទះខាងលើនេះបណ្ដាលមកពីរន្ទះបាញ់ចំប្រអប់កុងទ័រភ្លើង ទើបបណ្ដាលឱ្យឆ្លងចរន្តអគ្គិសនីឆេះផ្ទះខាងលើនេះអស់១ខ្នងទាំងស្រុងនិង១ខ្នងទៀតអស់ជញ្ជាំង១ចំហៀង។
ក្រោយពេលកើតហេតុភ្លាមៗ ត្រូវបានកម្លាំងសមត្ថកិច្ចនគរបាលផ្នែកអគ្គីភ័យស្រុកកំពង់ត្រឡាចសហការណ៍ជាមួយនិងប្រជាការពារភូមិចេញជួយអន្តរាគមន៍ប្រើប្រាស់រថយន្តទឹកពន្លត់អស់ចំនួន០១គ្រឿងទើបពន្លត់បានទាំងស្រុង។
នៅក្នុងហេតុការណ៍ខាងលើនេះពុំបណ្ដាលឲ្យមានគ្រោះថ្នាក់ដល់អាយុជីវិតមនុស្សនោះឡើយ៕